1-الاختيار الأول، هو إنك تجيب مهندس يشطب الشقة ويسلمهالك علي المفتاح، في الوقت ده بيكون إتفاقك معاه انه هياخد نسبة إشراف محددة علي إجمالي تكلفة الشقة والنسبه دي بتكون من 15% إلى 30%، وأهم حاجه يكون فيه بينكم عقد عشان متختلفوش بعد كدا.
-في حالة إنك جبت مهندس بتشتري دماغك وبترتاح من هم الصنايعية ومشاكل الشغل والاستلام وحساب الصنايعية وطلباتهم، بالإضاقة لكدا انك بتسيب شغلك كل شوية عشان تروح تبص علي شقتك، غير كل دا المهندس هيوفرلك كتيير جدا وهنوضح النقطه دي بالتفصيل في بوست منفصل بعد كدا.

2- الإختيار الثاني، هو إنك تشطب شقتك بنفسك، علي الرغم من إنه الإختيار الأصعب ولكن بيكون ممتع لأن تجربته هتكون مختلفة بالنسبالك وهو إنك تشطب شقتك بنفسك، ودا اللي هنشرحه بالتفصيل الدقيق في البوستات اللي جايه إن شاء الله. طيب دلوقتي أنا عايز أعرف تقريبا كدا شقتي هتتكلف كام لحد ما تتشطب، بص في عندي طريقتين ..

- الطريقة الأولي، إنك بتشوف متوسط متر التشطيب في السوق دلوقتي بكام وتضربه في مساحة الشقة الفعلية، متر التشطيب في السوق حاليا بيبدأ من 1500 وانت طالع يعني لو شقتك مساحتها 100 متر يبقي تكلفتها حوالي 150 ألف. بس خلي بالك إن دا المتوسط ممكن تجيب خامات أعلي أو أقل، عشان كدا الطريقه دي مش دقيقة بنسبة 100%.

- الطريقة التانيه، بتجيب متر وتبدأ تقيس مسطح كل فراغ عندك ومحيطه مضروب في أرتفاع المكان وتكتب جنب كل فراغ مساحة الأرضية والحوائط وتبدأ تشوف ف كل مكان هتعمل فيه إيه؟
عندك مثلا الريسيبشن، مساحة الارضية 40م2 ومحيطه 50 متر طولي مضروب ف 3 م ارتفاع، يعني حوائط الريسيبشن 150 متر مربع.

تتفق مع الصنايعي متر الدهانات بكام وتضرب المساحه اللي عندك في السعر اللي هيقولك عليه، كدا عرفت تكلفة مصنعيات البند ده.

لو عايز تعرف تكلفة الخامات، تشوف بقي إنت هتستخدم دهانات إيه وتسأل الصنايعي المتر من النوع ده هيتكلف كام وتضربه في مساحة الحوائط عندك، ومتنساش تزود سعر النقل ولو انت في دور عالي تخلي بالك إنك هتجيب حد يطلعلك الخامات فوق، وتعمل كدة ف كل بند.

مع العلم إن فيه بنود زي ( الدهانات - الأرضيات - الألوميتال) بتتحسب بالمتر المربع.وفيه بنود زي ( وزر الرخام والسيراميك - الكرانيش الفيوتك) بتتحسب بالمتر الطولي. وفيه بنود زي ( السباكة - ومرمات بياض المحاره) بتتحسب بالمقطوعية. وفيه بنود زي (شغل الكهرباء والأبواب) بتتحسب بالعدد.

كل بند بقي تبتدي تحسب مصنعياته وخاماته، وتبدأ تسأل وتدور عشان ميتضحكش عليك وخلي بالك من السعر العالي أوي أو السعر القليل في النهاية هيكون عندك إجمالي تكلفة المصنعيات ودة مش هيتغير، وإجمالي الخامات ودة ممكن يتغير باختلاف سعر السوق او الخامة اللي هتشتريها .

في المواضيع اللي جايه إن شاء الله هنبتدي نشرح كل بند من الألف للياء، وإزاي تشطب شقتك من غير ما يتضحك عليك وانت بتستلم من الصنايعية ، وايه الخامات اللي هنستخدمها في كل بند.

ولو عندك الشقه في حدائق الاهرام او حدائق اكتوبر او الهرم او فيصل وعايز تشطبها. هسيبلكم جميع ارقام التواصل ويشرفنا التعامل معكم