خلي بالك وانت بتشترى شقة... وركز معايا

1. ️ طبعاً لو قدرت انك تشترى شقتك فى الأماكن الجديده المنظمه الى تبع المجتمعات العمرانية الجديدة وتبعد عن الاماكن العشوائية فده كويس . ومش معناه انك لو مقدرتش يبقى متشتريش ؟  بس ركز فى كلامى للاخر
2. ️لو الوحدة السكنية أو العقار مخالف أو مش مرخص ، بس مفتوح ليها ملف تصالح تمام اشتريها. لو متفتحش ليها ملف تصالح يبقى متشتريش
3. ️ الأفضل انك تشترى حاجة جاهزه بإستلام فورى حتى لو على الطوب أو نصف تشطيب. اسألنى انا علشان المشاكل الى هتقابلك لو اشتريت على رسومات هندسية والتسليم بعد ٣ أو ٤ سنين
4. ️مفيش حاجه اسمها ان البائع هيعملى توكيل بيع للنفس والغير ويبقى كده اشتريت ..لا لا يعملك عقد بيع بجوار التوكيل
5. ومهم جداً يكون معاك محامى ️
6. ️عقد البيع الأفضل يكون مكتوب عند محامى ومكتوب كله كومبيوتر وبدون اضافات يدويه أو شطب وبدون مسافات بين البنود ، ويتم التوقيع  امامك على كل صفحه من صفحات العقد ولو بصمه جمب التوقيع يكون أفضل وفل الفل
7. ️ ولوهتبيع أو هتشترى ولسه باقى اقساط يبقى الاقساط  تتذكر فى العقد بمواعيد استحقاقها ويتم الإشتراط على عدم نقل الملكية إلا بعد سداد جميع الاقساط 
8. ولو انت البائع يبقى الأفضل متسلموش الشقة الا بعد دفع اكتر من نصف سعر الشقة على الاقل  
9. ولو انت  مشترى ودفعت فلوسك يبقى لازم تستلم الشقة فى نفس يوم دفع الفلوس
10. ️صاحب الشقة هو الى يبيعلك ويعملك التوكيل ولو سنه فوق ٦٥ اولاده يوقعوا(يمضو) شهود على العقد 
11. ️لو هتشترى من ورثه يبقى لازم يكون فى اعلام وراثة وتاخد منه نسخه وكل الورثة يوقعوا(يمضو) على العقد
12. وحاول تروح الشقة مرتين تلاته وعاين وإسأل البواب والجيران عن حالتها وطمنهم ان الكلام سر عشان يقولولك الصراحه وإسأل إذا كانت عليها مديونيات لاى حاجه تبع العمارة 
13. ️خلى بالك من قانون الأسرة فى حاجه اسمها تمكين من مسكن الزوجيه ؟ يبقى تشوف زوجة المالك .احسن يكون مطلقها ومعاها قرار تمكين والأفضل توقع شاهد على العقد
14. ️ ويعنى بعد متشترى على طول خلى المحامى يعملك صحة توقيع على عقد البيع 
15. ضرورى جداً يكون معاك محامى ثقة، بلاش تستخسر وتوفر اتعاب المحامى .. وجود المحامى هيأمنك ويطمنك ويمنع عنك بلاوى كتير، دور المحامى مهم علشان يتأكد من صحة مستندات الملكية ويتأكد ان الشقة مفيش عليها اي خلاف
16. ️ هيعملك العقد ببنود واضحه وصريحة تضمن حقوق البائع والمشترى
17. ️هيطمنك على الورق ومدى صحتة وقوته ، وصحة تسلسل الملكية
18. ️هيتأكد من الورق ويستعلم عن صحتة فى المحكمة او الشهر العقارى